1. J.K. Rowling – Novelist (Harry Potter) 
Harry Potter thawnthu ziaktu Joanne “Jo” J.K. Rowling hi tunhma chuan waitress hna thawk țhin a ni. A lehkhabu hi Publishers 10 chuang ten an hnawl sak hnu-in, a kal tawpna-a an CEO fanu kum 8 mi chuan a pa a ngen tlat avangin an chhuahsak hrâm a. Khawvela thawnthu ziak hralh tam ber (best-selling book series in history) a lo ni a, Kum 5 chhung lekin, Multi-Millionaire a nih phah! Kum 2008 ah khan United Kingdom-a hmeichhe hausa-ber 12-na a ni phak hial!

2. Ludwig Van Beethoven – Composer & Pianist
A violin tum thiam lo lutuk chu a Zirtirtu chuan beidawnthlâk a ti lutuk a, “Music lam leh hlaphuah kawnga beisei-bo a ni” a ti tawp. Chutih nâk alaiin, Beethoven chuan a ri hriatna a hloh zel a, a beng a ngawng hlen ta hial! Mahse, a kut-chhuak zinga ropui ber 4 te chu a Beng a ngawn hlen (completely deaf) hnu-a a siam (composed) an ni tlat!

3. Colonel Harland Sanders – Founder of KFC
Sanders chuan Kum 65 mi a nih-in a “Chicken Recipe, Kentucky Fried Chicken” siam hralh turin hmun hrang hrang 1000 chuangah a kal a, a hlawhchham. Kum engemaw zat a vahvaih-pui hnu, kum 75 mi a nih-in, a company din “Kentucky Fried Chicken” chu Dollar million 15-in an lei sak a, ram 120 ah dawr 18,000 chuang a nei tawh!

4. Walt Disney – Co-Founder Disneyland & Film Producer,
The Walt Disney Company (Disneyland) a din hma hian Walter Elias Disney chu a thawhna Newspaper Editor ațangin “idea a nei thlawt lo” tiin an bân a. Sum leh paiah vawi tam tak a tlachhia a, titi-ah chuan vawi 302 zet Company ten an hnawl an ti!

5. Sir Charles Spencer Chaplin – British Comic Actor & Filmmaker
Charlie Chaplin kha a naupan lai ațangin retheihna leh harsatna râpthlak tak takin a tuam a. Fahrah Enkawlna hmunah hial dah a ni! A chanchin ziaktu David Robinson phei chuan “khawvela tungchhova piang zinga rethei lutuk dinhmun ațanga hausa tak dinhmuna inhlangkai chanchin ngaihnawm leh rilru khawih ber a ni” a ti hial! Kum 1975 khan Knight Commander of the Most Excellent Order of the British Empire hlan a ni a. Kum 1962 khan University of Oxford leh University of Durham chuan Honorary Doctor of Letters an hlan hial!

6. Jack Canfield and Mark Victor Hansen – Chicken Soup for the Soul
Chicken Soup for the Soul lehkhabu an ziak (compiled) zawh khan Chhuahsak tura an ngenna chu New York-a Publishers 33 ten an hnawl a, California-a American Booksellers Association zinga 90 ten an hnawl bawk. New York Publishers phei chuan hmusit takin, “Nobody wants to read a book of short little stories” a tih sak! Atawpah, Health Communications Inc., chuan an chhuahsak ta a. Tunah chuan Ţawng hrang 31 laia lehlin niin, 53 Million Copies chuang zet an hralh tawh!

7. Elvis Presley – King of Rock & Roll
Kum 1954 khan, Jimmy Denny, Manager Grand Ole Opry chuan Elvis Aaron Presley chu rawih tlakah a ngai ngang lova, hmusit takin “Ka fapa, tih thiam leh tih theih dang engmah i nei lo ve, Truck khalh leh mai la, chu chu i tih theih leh thiam awmchhun a ni,” tiin a bân a. Mahse, Elvis Presley chu a beidawng duh mai lo. Tunah chuan King of Rock and Roll tih hiala koh a ni a, Zaithiam lâr ber (One of the most popular musicians of the 20th century) a ni ta hial!

8. Steven Spielberg – Film Director & Producer
Steven Allan Spielberg chu University of Southern California (school of theater & film and television)-a zir a dilna chu, amah-ah beisei tur awma an hriat loh avangin vawi 2 lai an hnawl a. Tunah chuan, khawvela film hmuhnawm ber ber-te (biggest movie blockbusters in history) chu a kut-chhuak an ni ta! Film Industry chuan, Lemchan Khawvela Steven Spielberg Hlutna hi Dollar 3.2 billion a ni e, an ti! Dt. 05.02.1994 khan, vawi 2 lai amah lo hnawltu University of Southern California chuan Honorary Doctor of Fine Arts in Chawimawina an hlan ta thung! TIME magazine chuan ’100 Greatest People of the Century’ a ti hial!

9. Stephenie Meyer – Novelist & Producer (The Twilight Series) 
Tunlaia film lâr tak Twilight thawnthu ziaktu Stephenie Meyer chuan Publishers (literary agencies) 15 hnenah Chhuahsak turin a dil a. An zinga 9 chuan an hnawl sak hmiah a, 5 chuan Chhan (reply) tlakah pawh an ngai lo! An zinga 1, Jodi Reamer of Writers House chuan beisei sang vak lo chungin “chance” a pe a. Mak tak maiin, Twilight series 3 ziak turin Dollar 750,000 pek an tiam nghal ta mai! Kum 2010 ah chuan, Forbes chuan a Thuziak etc. ațanga Dollar 40 million a thawhchhuah tawh thu a chhuah!

10. Michael Jordan – American Professional Basketball Player
Michael Jordan hi mi tam tak chuan hlawhchham awmzia a hre lo emaw kan ti mai thei. Ama inpuanna ngei hi ngaithla teh ang, “Game 300 zetah ka chak lova, vawi 26 zet ka chunga mawhphurhna pawimawh lutuk innghatah ka hlawhchham chiang hle. Ka hun chhung khan vawi tam tak ka hlawhchham nawn ka hlawhchham nawn a. Khami avang tak khan ka hlawhtling ta a ni” a ti!

Never Ever Give Up Believing In Yourself  ;-) 

England a Olney khua a, Kohhran pakhat thlanmual lian vakloah chuan, thlanlung pakhatah hian Granite a ziak thu tawite hi a awm a, a tlawm ngaihtuahin tlawhtu leh chu thlan lung ziak chhiartu erawhchu an tam fu lawi si a ni. Chu thlanlungah chuan heti hian a inziak a:-
“John Newton, Ziaktu(Pathianthu hriltu), Pathian laka hel leh vakbo a, sual kawng thuk tak lo zawh tawh, Africa-a Sal zuartute chhiahhlawh ni thin chu, Kan Lal leh Chhandamtu Isua Krista zahngaihna nasa tak avangin, humhim, zawnchhuah leh ngaihdama awmin, hun rei taka lo do thin Rinna thu chu puangchhuak tura ruat alo ni ta” tih hi.
John Newton-a hi Kum 1725 July ni 24 ah khan alo piang a. Kum 7 mi lek ala nih laiin a nu Sakhawmi tak leh Pathian tih tak chuan a boral san a ni. Apa chuan nupui dang a nei leh thuai a, Newton-a pawh chuan kum 2/1 chhung lek chu Sikul te pawh ahan kal ve leh lawp lawp na a, kum 11 lek ala nih lai atangin, a tuina zawk apa Lawng chu a zui ve ta a ni. Chu hmunah chuan, nun hel leh sual tinreng chu alo zir chho ta a, misual leh rothap tawrawt tak mai alo ni ta a ni.
Lawng Captain alo nita thuai a, Africa atangin Negro sal mankhawmin a lawng chuan West Indies leh America ramah phur thlain, Sum chang thlai chinna hmunahte chuan an hralh ta thin a, Khawngaihna reng nei lo leh Sual engpawh tih hreh lo anga hriat alo ni ta a.
Tumkhat erawhchu, Kum 1748 march ni 10 ah khan, Africa atanga England pana an haw laiin an lawng chu thlipui na em em maiin a rawn nuai ta a. Engkim hlohin an lawng chawp chuan Tuifinriatah chuan an pil vek dawn niin a lang ta a. Newton-a Lawngmi rilru khauh lutuk mai pawh chu a lo zam chhe ve ta hle mai a, Pathian hnenah a thinlung chhungril ber atangin tih tak meuhin a tawngtai ta a, “Lalpa kan chungah hian zahngai hram teh” tiin. Chu a thil tawn thlaphan thlak tak mai leh, chumi tuma an zin chhunga a lehkhabu chhiar Thomas Kempis-a ziah, “Krista tihdan zir” tih lehkhabu a chhiar atang chuan, Lal Isua Krista Khawngaihna leh zahngaihna Ropui tak chu lo hmufiahin, mi Piangthar alo ni ta a, He hla chuai thei lo, Khawvela tawng hriat lar chin zawng zawng tih theih deh thawa an lehlin leh, sak hlawh em em mai,
“Khawngaihna mak, mawi leh duhawm,
Sual riangvai chhandamna.
Suala bo hnu min zawng hmu ta,
Mitdel mivarna chu.”
tih hi alo phuah chhuak ta a ni.
A Pianthar tak hnuah pawh chuan, Sal hmanga sumdawn chu a chawlhsan nghal mai lo na a, tunah chuan, a salte leh a Lawnga thawktute lakah chuan mithar alo nita a, a ngilnei ta em em mai a ni.
Tumkhat erawhchu, Africa atanga Sal engemawzat America lam pana an phurh teuh laiin, a dinhmunah Lal Isua kha ding ve ta se, engtinnge a tih ve ang? tih amah leh amah ahan inzawh chuan, a tihtur dik tak chu a hre chiang ta hle mai a, a inngaihtuah harh ta thut mai a, a thiltih lai chu dik ati thei ta ngang lova, a Lawng chu Africa lam panin a her tir a, an kir leh ta a, Africa an thlen chuan an Sal man zawng zawngte chu an chhuah ta vek a ni. Tichuan, England a thlen leh hnu chuan, Lawngah kir leh tawh lovin, a thih thlengin rinawm takin Thuhriltu lam hna a thawk ta a ni.
A tunhma nun rothap leh pawisak neilo, sual kawng tinreng lo dai chikim a nihna atanga Pathian khawngaihna leh chhandamna alo chan dan chanchin sawi tur angah em em chu a thusawi ngaithlatu ten ngaihnawm an tiin, a thusawi a fiah bik em em thin a, Kum zabi sawmpariatna chhunga thuhriltu hlawhtling ber pakhat alo ni ta hial a ni.

Vawiin chu, ‘a pawi lo’ tih hla lo pianchhuah dan lam I han hrut dawn teh ang hmiang.
He hla phuahtu Horatio G.Spafford hi kum 1828 October ni 20 khan, New York a North Troy hmunah a lo piang a. Naupangte niin Dan lam thiam ani a, a hlawhtlingin sum leh pai lamah pawh a hmuingil fu a ni. Kristian tha tak ni bawkin, Sakhaw thilah pawh a inhmang fu mai bawk a, DL Moody-a rawngbawlna pawh a puibawm fo a ni.

Chicago a kan vak hma lawk khan, Spafford-a hian Michigan Dil kama Real estate-ah a sum leh pai peipun tumin Risk alo la(Chiahpuam a tum) a. Chung a sum dah zawng zawng chu, Chicago a kan vak tum khan, a kang ral vek a ni. A nupui leh a fanu 4 te chu, an rilru hahdam nan leh DL.Moody-a rawngbawlna puibawm ni pah fawm turin England-ah an chhungkuaa kal an tum ta a. An kal dawn tepah, rokhawlhna avangin Chicago-a a cham hnufual a ngai a, a nupui leh a fanu 4 te erawhchu, lo han kal hmasa turin a tir ta tho a, S.S. Ville du Havre Lawngin kum
1873 November thla khan England lam chu an pan ta a ni.

Nimahsela, November ni 22 ah chuan thu lungchhiat thlak tak mai an hre ta a. S.S. Ville du Havre Lawng chu British Lawnglian ‘Lochearn’ an tih nen an insu hlauh mai a, minute 12 chhung lekin a pil ta a. Ni engemawzat hnuah, a damchhuak chhun te chuan Wales rama Cardiff Lawngchawlhna an thlen chuan, a nupui chuan thirhrui a rawn thawn ta a, “keimah chauh ka him” tih thu thin thawng tak mai chu a pasal Spafford-a chuan a dawng ta a ni.

Chu thirhrui a dawn veleh chuan, Spafford-a chuan Lawng bawkin a nupui hnen lam chu a pan ve ta a, a fate ho boralna hmun lai vel an paltlang laiin, he hla hi thinlung leh tihtak zetin a a ziak ta mawlh mawlh mai a ni.
He hla hi Mizotawnga lehlin ani tawh a, a ngial angan lo deuhin an letling niin a lang a. Hla ang nilovin, a phuahtuin sawi a tum nia ka hriat dan ka han thai lang ve mai mai ang e:-

1. Thlamuanna leh hlimna te chu lui anga ka kawnga an luan dam duai lai ngei chuan, Tuifinriat tuifawn hlauhawm tak angin Lungngaihnain min rawn chim buan buan ta mai si a. Nimahsela, nang chuan, “Ka thlarau tan, A pawi lo e” ti zel thei turin min lo zirtir tawh si a.

2. Setana kutthak hnawihna ka ni emaw, fiahna leh harsatna khirhkhan tak tak pawh tawk thin mah ila, kei michaklo tak min chhandam nan hian, Pathian fapa Isua Krista thisen hlu tak chu leihbuakin a awm tawh a ni tih hriatchianna hlu ber mai hian ka nun a thunun tlat chuan, “Ka thlarau tan a pawi lo ve.

3. ‘Ka Sualna’, Ka sualna zawng zawngte hi, a then a zar chauh nilovin, a vaiin, a zavai takmeuhin, Krawsah khan alo khengbet tawh ani tih ngaihtuahna hian min va han ti lawmin, min va han ti thlamuang thin tak em. Chuvangin, Aw ka nunna Lalpa chu fak rawh.

4. Tichuan, Lalpa ngei chuan, amah ka rin tlatna chu ala rawn tilang fiah ang a, Van chhumte khi pher angin ala zial bo hunah, Vantirhkoh chungnungber Tawtawrawt ri nena hnehna hla puan chhuaha a awm hunah ngei chuan, Ka Lalpa duhtak ngei chu lo chhukin a hmel chu ka la hmu dawn si a. Chuvangin, engpawh tawk mah ila, “Ka thlarau tan chuan a pawi lo, a tha vek e”.

Hetiang ang vanduaina rapthlakin an chhungkuaa ro a rel lai pawha, chu a vanduaina lam dah lian tlat lova, Pathianin a awmpuina leh, a tana alo tuar sakna lam; chumi avanga nakina beiseina nung avanga ala chan tur ropui tak lam thlir tlat chunga, “Ka thlarau tan a pawi lova, a tha vel vek e” a ti thei tlat mai hi a ropui em em mai a, Kristian ringtu dik takte tan, chona leh entawn tur ropui tak min hnutchhiah a ni.

T. Zorampela hla phuah ‘Duhaisam (Zoram ngaih hla)’ hi chuan ka nâk a zen thlawt a ni!

Chhaktiang kawlrawnah hian leng mah ila,
I sakhming sawi reng kan bang thei si lo,
Ka pian ka seilenna ram tiin,
Dawn lungrukah nghilhni i awm thei lo.

Hmun danga awm, a bikin Burma rama kan unau, Mizo em emte’na Mizoram an ngaihzia hi aw… An awmna atangin anmahni chawr chhuahna tiin chhuang em emin an sawi thin a, a chanchin an ngaihven a, an sawi thin. Programme leh thil dang dang an buatsaih pawhin Kawl zaithiam leh Kawl fiamthu thiam an sawm ngai lo, Mizo zaithiam te, Mizo fiamthu thiamte an rawn sawm vang vang thin. Mizoram-a kalna remchang an zawng reng thin a, zaithiam leh midang dang pawhin hun remchang an hmuh chuan an hna dang kalsanin Mizoram an rawn pan thin; mahse, kan lo hmusit si.

Aw, Zoram ka ngai em a che.
Nang lo chuan lawm a kim thei lo,
Dar ang tawn leh ni her chhuak thuai se,
Thinlai damten len ve maw ka nuam e.

Zoram hi an ngai ngawih ngawih a ni. He a thunawn hian Pu Rosangliana ‘Zoram Ngaih Hla’ min hriatchhuahtir ziah lehnghal. Keini a ram chhunga awm zawkte hian Zoram nawmzia leh thlakhlelhawmzia hi kan hrethiam si lo va, hmun dang daiha kan unau awmte’n Zoram hlutzia hriain an rawn au vawn vawn zawk zawk thin a; mahse, kan lo hmusit si.

Kan ram kan hnam lo san zelna turin,
Kan nun kan neih kan chakna zawng hlanin,
Lungngaih mangan buaina let zel te,
I tan hlimten ka lo dodai zel thin.

Mizoram-ah an khawsa lo, mahse, Mizo an ni. He an nihnaah hian an chiang em em a, Mizo an nih avangin Mizote chenna Mizoram hi an ramah an pawm hmiah mai a ni. Kan thiam an theih an finna zawng zawngin Mizoram an chawimawi a, Mizoram nawmzia te hla-ah an chawi a, an phuah a, khawvel hriatah an puang chhuak thin. Mzo an nihna kawnga harsatna an tawh pawhin ram leh hnam tan tiin chhel takin an tuar a, an dodai thin. Kan ram leh hnam hmasawn nan theihtawp an chhuah a, hmun hrang hranga an inzarpharhna hmunah pawh ‘MIZO’ chu an tilang thin a, thu leh hlaah an chawi kur ngiai nguai thin; mahse, kan lo hmusit si.

Mahse, vangkhua leta fan leh ni chuan,
I chhunga lungduh unaufa leng zawngten,
Khawchhak mi tia hming min selin,
Sirah damten puan ang min lo hnawl e.

He hla chang hian min tihrehawm ngawih ngawih a; he hlaa ‘chang sakei’ ka ti hial, mahse dawt a ni hauh si lo. ‘Kan ram’ tia an lo chhuan ve ngawih ngawih thin tlawha an lo ‘zin’ chang hian a chhunga chengte hian hmuhsitna kawng hrang hrangin kan lo lantir a. Mizo kan ti duh lo, BURMA MI kan ti thin. He kan ram hi an intineitu em em a, an lo kal chang pawhin ‘zin’ an ti lo va, ‘let’ an inti hial a ni. Mahse, keini chuan, kan unaute hi khawchhak thil hrim hrim huat phah nan kan hmang ta zawk hlauh si. Aw Zoram, harh lul rawh! Kan ram kan hnam chawisangtute hian min zahpui lo. Mahse, keini zawk erawh chu Burma thil fak leh chawimawi te, Burma thil neih te, Burma hming sawi hrim hrim pawhin ‘I va Burma ve!’ kan inti mai thin. Zoram ngaia rumte hian Zoram hi an thlahlel ngawih ngawih a, kan lo hmusit chung chung pawhin hun remchang an neih chuan an rawn tlawh hram hram thin; mahse, kan lo hmusit si.

Aw, a na tuar thiam zawng a har,
Hrilh ka hai, lunglam ka lo vai,
I tan ka tuarna leh hlim ni te,
Zantiang tawnmang mawl mai an chang zo ta.

Kan hmuhsitna thil tih leh tawngkam zozaite hi an hre ve tho, an hai bik lo. Hrehawm ti takin an tuar tlawk tlawk thin. Zoram leh hnam tana an tawrhna leh thawhna zawng zawngte hi kan hmuh hmaih lui a, kan hre duh si lo. An tan chuan a na thlawt a ni. An ram ngeia an lo let leh chang hian hrilhhai leh zak, lungngaiin kan lo siam thin a nih si hi. Ngaihtuah teh, a nâ asin. Zalen leh ngaihngam taka len ve an châk a, Mizoram-a an awm loh lai, Burma-a an khawsak lai takngial pawhin tawngkam na tak takin kan umzui tawk tawk thin. Anni erawh chuan Zoram ngaih an bang chuang lo va, an thinlung hi MIZORAM a la ni tho tho thin; mahse, kan lo hmusit si.

Ramtin kiltina Zofate zawng hian,
Suihlung ruala thinlung hmunkhat puin,
Hmangaihnaa insuihkhawm zel hi,
Kei ka lungkham leh DUHAISAM a ni.

Hnama chiang chu kan hmuhsit Burma-a Mizo awmte hi an ni. Mizoram-a Mizo awmte zingah hnama chiang hi an va tam lo em! Tunge mahni unaute hmusit ngai? Kan unaute chu an chan a chhiat em em lai te, mangang leh hrehawma an rum laite hian kan tanpui zawk tur a ni lo’m ni? Khawvel danah foreigner an ni a ni mai thei, kan thinlungah erawh unau kan ni a, foreigner a awm lo. Mahse, keini zawng khawvel mi kan ni si a, inpumkhatna tichhetu zawkah kan la tang zawk zel a. Chuti chung chuan, thu leh hla hmangin inpumkhatna thu an la rawn au chhuahpui tawk tawk a, Zoram tana an duhthusamte chu an rawn puang chhuak thin a; mahse, kan lo hmusit si.

Aw Zoram, harh rawh; harh lul rawh!

Vawiin chu Mizo hlaphuahtute zinga ngaihsanawm ka tih em em Pi Lalruali leh a hlaphuah “Ka Chenna ram thlaler a ni Lalpa” tih hi I han en ve leh thuak thung teh ang aw.

Pi Lalruali hi Kum 1924 February ni 13 khan Sihfa khuaah a lo piang a. Naupanlai atanga mi hlim thei tak leh rual pawl thiam tak a ni a. Lehkha pawh thiam thei ang reng tak anih avangin 1936 khan Pawlthum Scholarship hmu phak ngei turin a bei a; mahse January thlaah a khup a lo na a, a vung a, a khuate a sik a, a khum bet chu ani ta reng mai a.

A natna lah chu, Doctor ten an han enchian chuan ‘ruhnget’ chi a lo ni lehnghal a, Durtlang Damdawiinah a kuma kum tam enkawl ani chung pawhin a dam tha tak tak thei lo a, Wheel Chair a hman deuh reng alo ngai ta a ni. Chutiang chuan, Pian tirha naupang hrisel leh harhvang tak ni si chu, ke nei reng chunga kal theilo, Wheel chair-a thut deuh reng ngai leh midangte bawihsawm ngai renga a awm chung pawh chuan, a thlarau nun erawh chu hrisel tha pangai tak ani reng thei tho a ni.

A vanduaina belhchhah turin, kum 1958 khan, Synod Dispensary Sihfaa a awm laiin a Lung lam tha lo avangin a tawngthei lo leh ta tlat mai a. Pathian hnenah, “Lalpa, hla min pe la, a satu apiang ka sawi ai sawitu-ah ka ngai tang e,” tiin a dil a; tichuan he hla hi a lo dawng ta a ni. A thluk hi Pu Rokunga siamsak a ni.

Khatia naupang harhvang, infiam nuam timi tak leh thenrual kawm thiam leh rualpawl naum ti tak ni thin kha, natna tihbaiawm tak mai, ‘ruh nget’ natnain a han tlakbuak a, kal thei lo leh infiam thei lo a awmin, pawna a thiante sikul kal leh infiam thawmte a han hmuh leh hriat chang te chuan, chutia Damdawiin khuma midang tanpui ngaia bawksawp ta reng mai nun chu, Mizoten chenna atana hmun hrehawm leh nuam lo ber mai nia kan hriat, tui awmlohna, ni sa rum rut hnuaia vaivut sa vur mai hlir hmuh tur awm, ‘Thlaler’ nen a tehkhin a, Buaina chhumpui chu a lo zing tup tup a, a Lalpa hmel an hliah bo fo thin a ni. Nimahsela, Lal Davida angin, chung tiang hun alo thlen pawhin, beidawnga vakbo mai lovin,

“Lalpa I hnena awm reng ka duh” a ti lawm lawm mai a ni.”

A lungngaih thawpik vawrtawpah pawh, Gethsemani huana a Lalpa Isua Lungngai vawrtawpa a tawngtai kha a hrechhuak a, a Lalpa hnung chu zui ve niin a in hria a, a Lalpa duhtak tanpuina a au ngawih ngawih mai a ni.

A Lalpa hnenah a tawngtai ngat ngat a, a chhanna aw nem a nghak reng a, a Lalpa duhtak Thlamuanna ‘Aw’ chu a ngaichang reng a, chu a thil nghah chu a hmu ta ni ngei tur a ni, chang thumna leh chang li naah chuan a thusawi ki a lo dang ta a.

Chutiang buaina leh Lungngaihna chhum ten an chim a, a khawvel a thim khup lai chuan, Chhum kara ni eng mawi tak lo lang angin Lalpa thu chuan a thinlung thim chu a rawn chhun eng ta raih mai le. Chutah zet chuan a tawrhna leh vanduaina lam en tawh lovin, Kalvari-a Hmangaihna rawn inpuang chhuak chanchin kha hrilh darh alo duh ta a, chumi ti thei tur chuan, a Lalpa tanpuina lo chuan atan tihrual ani lo tih a hria a, a Lalpa tanpuina chu a au ngawih ngawih mai a ni.

A Lalpa chuan awmpui rengin, a aw mawi tak pawh hre thin mahse, mihring lam chanah chuan, Nulaa pumpa, Wheel chair leh khuma tal tak reng mai chu, a hrehawm na chin a awm lo thei si lo. Nimahsela:-

“Hrehawm mahse I ta ka ni Lalpa,
I tan nung turin min pui la;
Ka hun zawng I tana hman ka duh,
I tan chauh min tithianghlim ang che.”

tiin a tawp a khar thlap a ni.

Thu belh: Pi Lalruali hi kum 2001 September ni 3 khan Lalpa hnenah a lo chawl ta a. Kum 1996 a Aizawl a B.Ed ka training lai khan, Mizo Academy of Letters ho buatsaih program-ah ka hmu ve hlauh mai a, Vannei ka inti hle a ni. Vanapa Hall-ah he hla a phuah chung chang hi an zawt a, a ngaihnawm ka tiin, ka rilru a hneh tak meuh mai a, Wheel Chair-ah a thu a, a sam a tuak var vek tawh a, Mi thianghlim zahawm tak, Mother Teressa ang maiin ka hmu a ni.

Click here to view the embedded video.

BCM Serkawn Kohhran Zaipawl chuan video thar Thim ata engah, Beramno Talh tawha & Halleluia Chorus chu an tichhuak ta. He hla hi tunlai tak (modern version) in an arrange a ni a, ngaihthlak a man hla khawp mai. Sunday pual ni pah fawmin ka rawn dah ve e.

Violin tum thiam avanga Khawvel puma hmingthang hat Old Borneman Bull, ‘OLE BULL’ tia an koh thin kha, tumkhat chu, ramhnuaiah kawng a bo ta a. A awmna chin hre lova ngaw kara a vah a vah naah chuan, hmun pakhatah hian, thingtum remkhawm hmanga sak IN chhete hi a hmufuh ta hlauh mai a, a va pan ta a. A hmun a thlen meuh chuan khua a thim chiang tawh a, amah lah chu a chau chhe tak zet tawh a, thilo a ruangin kawngka bulah a va let tawp a ni ber mai.

Vanneihthlak takin chu in chu Sakhuana avanga inserh hranga Ramhnuai hmun fianrial taka Pathian pawl tura mahni chauha awm puithiam pakhat In a lo ni hlauh a. Ani chuan alo khawngaih em em mai a, a inchhungah a lalut a, eitur te siam sakin a eitir ta a. Chutia a lo harh leh tak deuh hnu chuan meilum an ai dun ta a. Chu puithiam chuan, Violin hlui chhe tawh tak mai hi a lo nei a, chu chu a han la a, a han tum ta a ni. A hruite chu herh dik an nih loh avangin, a lai ruai mai a, a nuihzatthlakin mawina reng a nei lo a.

Ole Bull chuan, “I Violin kha ka tum thiam I ring em?” tiin a han zawt a. Puithiam chuan nui chungin, “Ka Pu, ka Violin hi chu midang tum ve chi a ni lo, keipawhin ka zir rei a nia, I tum theih ka ring lo deuh a”, tiin a chhang a. Ole Bull-a chuan, “Ka pu, khawimaw, ka lo tum chhin ve reng reng teh ang” a han tih takah chuan, Puithiam chuan a pe ta a. Ole Bull chuan a hruite a han herhdik zung zung a, a han tum ta mai a le! Chu thing In leh ngaw reh ruih mai chu, rimawi lutuk tak mai chuan a fan ta raih raih mai a. Ole Bull-a tak pawh chu, lungleng tak leh a rilru zawng zawng pea tum a ni bawk a a kutthlak a dik lehzual zaih mai a. Mihring kutchhuak nilovin Vantirhkohten hmuh theihloh atangin an rawn tum ve ta emaw tih mai tur hian a mawi em em mai a ni. Chutiang Music mawi lutuk tak mai a Violin atanga rawn richhuak a han hriat meuh chuan chu puithiam rilru pawh a hneh lutuk a, a mittui tla zawih zawihin a insut hlawp hlawp mai niin an sawi hial a ni.

Keini mihringte pawh hi, Sual bumna avanga kan hrui thenkhat lo chat rem rum tawh, chat lo deuhte pawh herh mil loh avanga lai ruai mai, thil tha kan hriat ve te pawh, tih kan han tum ve viau pawh a ti hleithei tawh lo, sual kawng bawk awn leh thin kan ni a. Amaherawhchu, chu hmanraw chhe tawh leh ri a pek chhuah chhun pawh lai ruai mai, mawina leh awmzia reng nei thei tawh lo chu A siamtu, Pathian hnenah a duh ang anga hman tura kan pek erawh chuan ani Pathian kuta a awm chinah chuan RIMAWI tak leh tangkai takah, midangte tana malsawmna leh rimawi tling khawpin a lo hmang thei thin a ni. He thil hi kan hriat fuh loh thin avangin, keimahni thiamna leh theihna hmangin beih ve kan tum thin a, mualphona, beidawnna leh hlawhchhamna kan tawh phah fo thin a, a siamtu leh a hmang thiam, Pathian hnenah a duh ang anga a lo hman atan pe ila, a niin midangte tana malsawmna tling khawpin rimawi tak chhuah theiin a lo tum dawn a ni.

Ropuina lamtluang zawhin,
Chak takin tlan thin mah la;
Chu hringnun lamthluang chuanin,
Thlanmual a chhun tho si a.

Hmangaihna par chu tlanin,
A zu thlum tak pawh dawt la;
Chu lawmna puarpawleng chuan,
Mittui a ngiat tho si a.

Vanglai hi nuam ti takin,
Hlimna nen hmang ral mah la;
Chu hun tawi a ral hun chuan,
Tarin min hmuak tho si a.

Thian tha tak tak te siamin,
Hun hlimawm tak hmang mah la;
Thenna chuan lo hmuak chein,
Khawhar a thlen tho si a.

Chhungkhaw ropui tak neiin,
Vanram tlafual chen mah la;
Lungduh te an liam niin,
Tahna a thlen tho si a.

September ni 9, 2013 zan dar 10:45 PM hi zaithiam leh hlaphuah thiam CFL Hmingthanga lei taksain he khawvel a chhuahsan kum khatna a lo ni ta a, a lei taksa chuan thawhlehna nghakin Samthang thlanmualah riahrun a bel mek a ni. He a thihcham pual hian amah ngainatu leh a fans khawvel hmun hrang hranga awmte chuan urhsun takin mahni hmun theuhah hun hman an tum a ni. CFL-a fans i nih chuan facebook Group pakhat, CFL HMINGTHANGA Thu Leh Hla i lo join ve dawn nia. Tin, Thawhtan tlai dar 5:30 ah hian CFL-a pualin Doordarshan, Aizawlah CF_a u Pi Lalngovi w/o Pu Thasiama te chuan CFL-a zai pahnih an thlang a, a zai leh a hringchan thlalak hrang hrangte en theuh turin CFL-a fans zawng zawngte min sawm a ni.

Nikum September ni 9 zan dar 10:45 khan Khawbung PHC ah TB natna avangin CFL-a hian khawvel a lo chhuahsan tawh a. Khawbung PHC ah hian thih ngam khawpin tun hma khan hliam na tak a lo tuar tawh a;nimahsela tha taka lo chhuakin zaiin zofate min awitlei a nih kha. Mahni damna hmun ngeia boral leh ta chu CFL-a hi a lo ni ve ta a nih chu. CFL Hmingthanga hi a boral tuk hian mi tam takin thlanmualah an thlahliam a, a ruang hi thlanmual an panpui lai hian ama sak ngei, “Ka nau vala” chu YMA Information Centre atangin an play a, mipui a vel tap nasa hle. CFL-a thih thu hian zoram mai bakah khawvel hmun hrang hranga zofate a deng chhuak hneh hle a ni. Champhai District Promotors’ Club chuan nikum November khan CFL-a Tribute Concert an siam a, November ni 22, 2012 a CFL-a lungphun Samthang khawtlangin an neih pawh khan Concert an buatsaih bawk a ni.

A chanchin chipchiar leh kimchang chhiar duh chuan a hnuaia link hi tlawh mai tur a ni e:

http://jlremsanga.blogspot.in/2013/09/cfl-hmingthanga-thihcham-vawikhatna.html

Krismas ni a hêr chhuak tep a
Kei chu mî intlar put zingah chuan ka ding ve a,
Thil pêk pahnih-khat lei turin.
Mahse, Krismas boruakah erawh ka chêng lo.
Ka hma chiaha ding chu
Mipa naupang manganna hmêl pu chu a ni a;
Mipa naupang dang ang bawkin
A hawi kual a, a mit erawh a ngui êm êm a,
A kuta a ken chu- Pheikhawk khing hnih a ni.

A thuam chu a hluiin a tet nasa hle a,
A chhîp atanga a ke hmâwr thlengin a bâl a;
A thil lei man pêk a hun chuan
A thusawi chuan ka rilru a va khawihin
A va ropui tak em!!!

Dâwrkaitu hnenah chuan :
“Ka pu, he pheikhawk hi lei ka duh a ni,
Ka nu tan ka duh a ni.
Zânin hi Lal pian zân a ni a,
He pheikhawk hi a ke tawk chiah chiah a ni.
Khawngaih takin I hmanhmawh thei hram em?
Ka pa chuan hun a tam tawh loh thu a sawi a,
Ka nu chu natna khirh takin a tlâkbuak mêk a ni.
Mahse, he pheikhawk hian a nuihtîr ngeiin ka ring a,
A nuih chuan a hmeltha a,
Chu hmel duhawm tak chu ka hmu châk a,
Isua a tawh hunah chu hmêl ngei chu
Pûin a hmêl chu duhawm se ka duh a ni.”

A pawisa chu vawi engemaw zah an chhiar a,
Dawrkâitu chuan, “Ka fapa, a tâwk zo lo a ni.”
A iptê chu a zen a, a zen leh thin a,
A rawn hawi chhuah leh chuan :
“Ka nu chuan Krismas hlimawm tak a hmang thin a
Mahse, kum tam tak chutiang chu a hmang tawh lo.
Ka pu min hrilh rawh, engtin nge ka tih ang?
Engti kawng zawng pawhin he pheikhawk hi ka lei a tul a ni.”

Chu veleh kei chuan ka pawisa ka phawrh vat a,
Dawhkânah chuan ka dah a.
Engti kawng zawng pawhin ka puih a ngai a ni.
A hmêl mawi lutuk pu chunga a thusawi kha
Engtikah mah ka theihnghilh leh ngai tawh lovang :
“Ka nu chu a va mâwi dawn êm!”

Lawmthu sawia a tlân lai ka hmuh chuan
Ka thinlung chu Van Hmangaihna chuan a tuam nghâl a,
Ka taksa leh thlarau chu tihdanglamin a awm a ni.
Pathian chuan kha naupang tê kha,
‘Krismas Awmze Dik Tak’ min hrilh turin a rawn tîr a ni.

‘Aw Lalpa, i malsâwmna hlu’ tih hla phuahtu Pu Ch. Pasena (Chawngnghilhlova) hi kum 1893 khân Khawrihnîmah a lo piang a. Sir Herbert M.P. châwmin kum 1924 & 1925 khân London-ah lehkha a zuk zir a; Mizote zîngah London-a lehkha zir hmasa ber a ni nghe nghe. Theih tâwpin Pathian rawng a bâwl a, kohhran upa niin kohhran sikul Principal a ni. ‘Tichuan, a rawng a bâwl thin Lalpa hnênah December ni 2, 1961 khân a lo châwl ta.

Ch. Pasena hian Pathian malsawmna kan dawn nasatzia a hmu chiang hle a. Kawng thenkhatah chauh ni lovin “Kan engkim chungah a lang,”  a ti hial a. Kan lût leh kan chhuak, kan thu leh kan ding pawh hi Pathian thu vek a ni a, keimahniin engmah kan tithei lo tih a hmuh chian êm avangin “I thu lo chuan kan nunna hlu, kan neih zawng nên a ral ang,”  tiin a au chhuahpui a ni.

Mihring famkim lo, duh tinrênga khat, awhna suala hrin, thinlung uire kan ni chung pawha kan aw neih chhuna “Fak tâwk lo”  tia insit tak chung leh Pathian thlazâr hnuaiah lo chuan himna leh damna a awm lo tih hre bawk siin “Min ensan suh”  tiin a ngên a; “I duhzâwng min zirtîr rawh,”  a tih hian a zawm famkim theih dâwn vang ni lovin Pathian duhzâwng hriat hi khawvêl finna hriat aiin a tha zâwk a, A duhzâwng anga awm chu mihringte tihtûr awm chhun a ni tih a hriat chian vang zâwk a ni. Mihring duhzâwmg hi zawng sual lam âwn sa a ni rêng a.

Kum hlui mual a liam a, hnah hluite an tîl a; khawvêl mawinate leh mihring ropuina te rial angin a ral a. Kan sualna te chu tu ma nawh reh theih tawh lohin hunin a liampui ta vung vung mai si. Kan ‘thatlai hun’ te chuan Lalpa hmaa kan dinpui hun nghâkin zamual a liam ta. Nimahsela, ringtute chuan thlasik zîng ni chhuak êng sar ang maia beiseina duhawm kan nei. Chu beiseina chu Ch. Pasena hian hla hmangin “Kan sualna zawng zawngte Lalpa, I theihnain a tihfai hun hmuh kan châk,”  tiin nghâkhlel takin rinna mitin a thlîr dauh dauh a ni.

Kum 2013-a kan tihsual te, kan lo tawlh thlûk tawhna te chu tu nge nâwt reha siam tha thei awm? Tu mah kan awm lo. A nih chuan beisei nei lêk lovin kan indawm kun reng dâwn em ni? Ni lo ve. Ch. Pasena bawk hian “Kan faka che, I khawngaihna kan hmuh hian,”  a lo ti mathlâwn lo va; Pathian khawngaihna leh hmangaihna avang chuan kan sualnate chu nawh reh theih a lo ni leh ta! Kan tihsualah ngaihdam dîl a, TISUAL LEH TAWH LO tûra Pathian chakna rinchhana ke kan pên a pawimawh hle. Beiseina thar nên, kan chunga Pathian thiltih mak hmuh inbeiseiin Pu Ch. Pasena ang hian rinna mitin kum 2014 hi i thlîr ang u.

Bill Gaither leh Gloria hi nupa inhmangaih leh zirtirtu tha tak an ni ve ve a. He hla “Because He Lives” tih hi kum 30 dawn liam tawha Pathian hnen atanga an dawn lai hian, Bill leh Gloria te hian nau thar neih an inbeisei lai mek a ni. Hetih hunlai hian harsatna namen lo an tawh ve fo thin avangin, Gloria chu lungngaia a khah mek lai a ni. Gloria chuan he khawvel chhe tawh takah hian he ka nau pai lai mek hi a lo piang ngei ang a, he khawvel hian eng nge a pek ve ang tiin naute hma hun lo awm turah chu a thlirpuiin a tal buai ve hle.

Lungchhe vankai meuhvin tap mah suh se, a beidawnna chuan kawl eng a thlir tir thei meuh bik si lo. Mak tak maiin heti hian Lalpa’n an thinlungah thu a sawi ta-

Because He lives, I can face tomorrow
Because He lives, all fear is gone.
Because I know, I know, He holds the future
And life is worth the living just because He lives.

And then one day, I’ll cross the river,
I’ll fight life’s final war with pain;
And then, as death gives way to vict’ry,
I’ll see the lights of glory and I’ll know He lives…

“Yashua chu a nun avangin naktuk leh naktip-ah pawh a pangngai reng thin. Kan tan leh he ka nau pai mek la tan pawh hian a nun reng dawn avangin, kan hmalama thil chu kan tawn ngam tur a ni a, hlauhna zawng zawng ata mi chhanhim dawn a ni. A chhan chu hei hi ka hria a, hun lo la awm tur hi a kutphah ropuiah a innghat a, he khawvelah hian damchhan hian hlutna a nei fo ang; min la khai chuak dawn a ni- Amah chu a nun reng avangin…” tiin.

He thu hi han chhiar teh, a va rapthlak em.

Odhisa (Orissa tia koh thin kha) thingtlang khaw pakhat Manoharpur-ah chuan, khawfing a chat tep tawh a. Kum 1999, January ni 22 a ral tep tawh tihin Dr Graham Staines, Australian Missionary phar hote zinga thawk thin leh a fapa te pahnih Philip (Kum 10) mi leh Timothy (Kum 6) mi lek te chu an motor Willy’s Station Wagon-a an mu lai chu Bajrang Dal activist pakhat Dara Singh leh Hindu firfiak hovin an motor chawpin an hal hlum a nih kha.

A nupui Gladys Staines chuan ti hian a sawi-

“Lalpa chu ka kiangah ka pasal (Graham Staines) hnathawh te thawk zo tur leh hlen turin a awm reng a, a awm zel bawk dawn a ni. Mak tihna erawh ka nei- eng vanga rawng taka thah ni turin, eng nunchhia leh rawng engmah a hman kha zan khan ka hre mawlh si lo. Ka pasal leh ka fate thahnaa inhnamhnawih te laka phuba lak erawh ka suangtuah ngai lo va, ka beisei leh duh ber zawk erawh chu inchhirin; nun thar neih nan hmang mawlh rawh se tih hi a ni”

An vuinaah chuan Gladys Staines vek chuan he hla hi a chham chhuak a-

Because He lives, I can face tomorrow
Because He lives, all fear is gone.
Because I know, I know, He holds the future
And life is worth the living just because He lives.

A ni lah tak a. Mihringte hmelma tihbaiawm ber mai THIHNA meuh pawh hneha tho leh THIHNA titlawmtu YASHUA kan neih avang hian, kan va vannei em!!!

Mahse, zawhna inzawt fo ang che. Harsatna vawrtawp tuara i rum thin lai khan, I can truly say that Because He lives, I can face tomorrow…i ti ve thei ang em le???

He hla hi lo ngaithla ve ru. Hmanni LPS demand channela ka hmua ka zawng char2a. voiin youtubea ka hmu hlaua. ka rawn share ve top mai. A hla thu athain a nung em ani. a hla hming  ”Jerusalem Thar”

Click here to view the embedded video.

“Halleluijah Ka sual faina Krista thisen, Khawpui thianghlim luhtheihna thisen hlu, Ka thianghlimna le ka felna aloni, Thisen Thisen Hlu ka chatuan hla alo ni”. 

Pu. Vanneihtluanga phuah Nl. C Vanlalawmawii sak,video thar a en theih ta.He video hi Pu. K Kawlkhuma((L)) hriat reng nan-a siam ani. He video hi Pu. Rosangliana (Zorock) leh Pu. Lalhmingchhuana (Lalte Videography) te puihna zarah hlawhtling taka puitlin ani. He hla hi midangte tana malsawmna a ni ngei ka beisei.

Click here to view the embedded video.

Hman deuh khan Music Video hrang hran hi ka post ve thin a, tun tum chu an ni hi min lo en sak ve leh thung teh u, an ni hi Kolasib Venglai Branch KTP te enkawlna hnuaia awm an ni. An page a description awm ang ang hian kan paste a nge.

He hla hi Kari Jobe hla atanga siam ani. Kum khat chhung kan inzir a, kan duhdan ang takin chhuak lo mahse Pathian in a duhdan tak in min tih chhuah sak thung. He hla kan buatsaih lai hian Pathian in rin tlak anih zia min hmuh tir a. Recording kan tih hian sum leh pai kan nei lo, mahse kan han zawh meuh chuan in tum chawp Pathian a rawn che a, sponsor kan hmu fel der mai. Chutiang chiah chiah tho chuan video shoot kan tan leh tawp a rinna in. Lalpan he hla puitlin tur hian min duh aniang kan senso te chu kan ngaihtuah buai em em ngai loin mi thahnemngai ten min tum sak leh ani. Kan Pathian hi a ropui a, fak tlak ani. Eng harsatna pawh tawk ila ani chu min thlamuantu ani.

Band Line Up:
Machhantei – Vocals
Apuia – Vocals/Keyboard
Benjamin – Guitar
Rotlinga – Guitar
Rinfela – Drums
Feltea – Bass

Click here to view the embedded video.

Tlawng track I lo sawm ang…

Kalna tur dang i hriat loh chuan
Kal lo mai rawh
Awm mai mai rawh

Lunglei.. leh Buarpui ah te
Silpauling an… lo zar ang

Auld Lang Syne Hla thluk hmanga Zaipawl(Mizo) in an sak kha eng Zaipawl nge ni, min hrilh thei in awm em?

Rawn submit-na chu rei tawh viau mahse, hria kan awm mial takin

Click here to view the embedded video.

Click here to view the embedded video.

He hla hi a ropui thlawt a ni.

Ka Hringnun, Hei Hi Hria La
by H. Vanlalhuma

1.Ka hringnun, hei hi hria la, khawvel chhandamtu atan,
Lal kum chhiarna zawkah ngei, leilunga zin i nih hi;
Khawvel tam i nun hlan la, nangma kraws ngei chu puin,
Khawvel mamawh Isua chu, nangmah ngei i nih hrilh rawh.

Tihduhdah tuarna leh thihna, hmuhsit endawngnate,
Kan hmaa no awm, mahni kraws pu chung zelin;
Tlanchhuahte’n tlan chhuah hna thawk a,
Chhandamtu ni zelin, kan hun a thleng e,
Kan hun i hai lo’ng Lal chhungte’n.

2. Khawvel mamawh Isua kha, tunah zawng a awm tawh lo,
Keimahni ngei hi Lal ruat, Isua chu kan ni si a;
Isua kan nihna tak pawh, hmana mi kha kan ni lo,
Hun hai lo Lal ram mite, chhandamtu Isua kan ni.

3. Ka hringnun ka hrilh che hi, khawvel hnenah puang ang che,
Khawvelin a mamawh ber, Lal Isua a nih si chuan;
Nangmah chauh hi i ni e, khawvel hmuh tur Isua chu,
Nangmah lo chu khawvelin chhandamtu dang a nei lo.

4. Aw ka Pa, khawvel awm hma pawha mawina ka neih khan,
Tunah min chawimawi ta maw, khawvelin an hriat nan che;
Ei tling lo ram chawimawina, tunah ka pe let thiam ta,
Chhandamtu nih i tlin hi ka lawmzawng a ni si a.